Hä? Guete morge ;-)
Geschrieben am 26.10.2006 um 16:26
Kategorien: N/A | 1 Kommentar
Häjo, denn stoht halt en grosse Goldtresor im HB Züri 
Kei Ahnig was das söll, aber gseht no läss us… 
Und des Rätsels Lösung:
Tusig glich dummi Lüüt hend nüt bessers ztue als au go gucke was do drin isch
Uuuuuund:
*Freibier* aha, super sach
Studiumstart
Geschrieben am 23.10.2006 um 19:10
Kategorien: Studium | Kommentar schreiben
Hüt isch es mitem Studium a de ETH losgange, Maschineningenieurwissenschaften Bsc - tönt no läss Jetzt bini au mitere
pimp @student.ethz.ch usgrüschtet Hüt isch chlige Ifüerig gsi, so wo ist was… Morn hani denn di erschte zwei Vorlesige: Innovationsprozess und Lineari Algebra, mol gucken Und das es no es Bildli het:
Empfang bim Chef ;-)
Geschrieben am 20.10.2006 um 21:59
Kategorien: N/A | Kommentar schreiben
Am Donschtig hemmer wege üsere Maturaarbeit bim Bundespräsident Moritz Leuenberger im Bundeshuus im Salon du Président en Empfang mit Apéro gha
Und do sind alli Teilnehmer am EU Contest. Und jo, cha passiere
Last but not least - Wuche 13
Geschrieben am 06.10.2006 um 19:05
Kategorien: RS | 1 Kommentar
So das wird vorerscht mol de letschti RS-Blog vo mir si, de Chrigul und de Kenel werdet vilicht jo uf erer eigene Siite (http://chgrab.freaque.ch/blog/) wiiterbloge, mol luege Für mi gohts denn - so stohts ufem Papier - nögscht Summer wider wiiter.
Die Wuche het mitere 60-Stunde-Üebig agfange und drum hend mir au scho am Sunntig am 12:00 und nöd erscht am 23:30 müese irucke. Denn simmer los und hend üsen Bereitschaftsruum bezoge, hend Biwak ufgstellt und Wachtpöschte gmacht. I ha miteme andere sWC baue und zmol luege so en komische Chopf ine - “Grüezi Oberscht Schuelkommandant” Das de nüt bessers ztue het als mir zeh Minute bim anehenke vo Blachene für es WC ztue het Abem Obig am achti hets denn gheisse: “Leben und überleben - si möstet do bis zu sechs Mönet lebe chöne.” Denn hets agfange mitem Wachtplan und i ha zerscht mol drü Stund schlof gha. I ha nöd in Schlofsack wölle, will alles recht nass gsi isch - also eifach so anelige. All 20-30 Minute wider verwachet, wills huere chalt gsi isch und immer Lüüt umeglofe sind. Also eigentli nöd gschlofe. Denn fangt dWach ah, i mues mit eim zwei Stund undere Brugg stoh. Mit Funk wo nöd tuet und emne Nachtsichtgrät. Nochher ei Stund “Reserve”. Also im Duro hocke und schlofe wär dIdee, aber i ha müese de Funker vom Wachtkommandant sii. Denn e Stund uf de Horchposchte und am Schluss no e Stund ad Barriere. Döte chunt zmol es Auto und haltet ah, stigt ein us… Und i so langsam ufgstande und seg so chli vor mi ane: “Zuetrittskontrolle Kp 2″ und denn de ander huere luut: “Schuelkommandant Stellvertreter!” ZONK. “Dörfi ine?” - “Moment, i frog rasch” und denn rasch funke und so, wie mers glernt het und non schöne Tag gwünscht Denn am halbi füfi Tagwacht, esse und Marschvorbereitige. Denn gohts los uf de lässig 25km-Marsch. Denn simmer am Mittag acho, alli voll kabutt, aber sind go sondiere. Will mir nöd so vill ztue gha hend, hemmer ab und zue chli chöne anelige, aber zum schlofe hets eifach nöd glanget. Denn am Obig zerscht wider drü stund gschlofe, dasmol richtig Und denn am halbi zwölfi wider ufgstande und Wacht gmacht bis am Morge früeh. Denn wiiter gange mit de Üebig, das heisst für üs sondiere. Und mir hend sonen dumme Standort gha, und drum sind di meischte Sondierige für nüt gsi. Di letscht und entscheidend het denn klappet *hechl* Am Nomi hend denn Kannonier serschte mol richtig gschosse und mir hend i dere Ziit chöne üsi Fahrzüg abgeh. Alles butze, kontrolliere, … Defür hemmer kein Harst gha, super Sach Denn no chlige PD am Gwehr und Materialkontrolle und am elfi dihei gsi am schlofe. Also i ha i dere 60h-Üebig guet 6 Stund chöne schlofe
Am Mittwoch isch denn WEMA gsi. WEMA stoht für irgendwas wie “Wiederinstandstellung der Einsatzbereitschaft von Material und Fahrzeugen im Ausbildungsdienst” und isch de Nochfolger vom WEMI (”Wiederinstandstellung der Einsatzbereitschaft von Material und Fahrzeugen im Instruktionsdienst”). Fortschritte in der Armee Mir hend müese dAggregat kontrolliere, butze und vorallem Pause mache. Will dChuchi au scho sache am abgeh gsi isch, hets nur es Sandwich geh. Aber üsen Chef het denn gmeint, das er Sandwich hasst. Und het üs drum au öpis vom McDonalds brocht Denn simmer nochher wider uf Stammheim brocht worde, sind chlige de Bimbo vo jedem Vorgsetzte gsi und hend no “After the Sunset” glueget. Denn isch Kompanieobig gsi - also wer sich drunder öpis tolls vorstellt, bi üs es isch das nöd gsi: Es isch zNacht gsi mitme Steak und Bier. Suscht nüt. ZONK. Denn go schlofe und am drü ufgstande, willi Wacht han. ZONK
Am Donschtig bim Morgeappel hani chlige schmunzle müese, will de Feldi so O-Ärm macht bim ACHTUNG Denn holt mi de Kadi use, seit am Zugfüehrer er söll Appell mache und nimmt mi hinders Huus und schiist mi voll zämä. Er het so luut gschraue, dass de Feldi mi nochher gfroget het wasi gmacht han das mer en bis uf Wil ghört schreie… Jo i ha mi denn halt entschuldiget und bi so - so heters uf all Fäll öpe 10 mol gseit - Disziplinarmassnahme entcho I ha nochher vom Zugfüehrer erfahre, dass er dihei chlige Ärger het mit de Frau het oder sowas und drum chlige greizt isch. Und do eignet sich doch de Rekrut Müggler doch guet zum chlige Dampf abloh De rescht vom Tag Material richte und abgeh, und vill umesitze.
Am Obig hani für all mini Wetterkollege no chline Gschenkli mitgno und verteilt.
(üsen Rekrut wod Nationalhymne vo Dütschland chan ;-))
(Zur Fortsetzig vo de Chläberli-Tradition…)
(Damit au mol de Berner chlige schneller sich ;-))
(üsi Fahrer: de links heisst Fuchs)
(üsen Herr wo wöt UT werde chunt en UT-Stempel über ;-))
(und für die wo gern Snus hend: In Schwede chunt mer das über ;-))
(und pimp my rätselbuch :-D)
Am Fritig morge hemmer dUnterkunft butzt und uf de Appell gwartet wos no Sold, EO, und vorallem: de Soldat und sFunktionsabzeiche geh het I bi jetzt Wettersoldat Und uf mis Schneeflöckli als Funktionsabzeiche bini natürli bsunders stolz
Demfall allne wo no wiiter im Militär sind alles guet und hebet eu Sorg!
Seines Zeichens, Sdt Müggler (Art Wet Sdt)
Active Hyper Bass Pro (Deluxe Gold Special Limited Edition v.43.s.23)
Geschrieben am 06.10.2006 um 18:12
Kategorien: Steinbruch | Kommentar schreiben
Immer wieder guet so Sache *lol*
Aktuell
- Bachelorarbeit abgschlosse und Liiiiseberg
- Trams…
- Chuchi, Projekt, Preem und Robot-SM
- Cortégen
- Volvo, Hafe, Projekt und Fuessball
- Stockholm, Unihockey und Jungwachtleiter :D
- Flo uf Bsuech
- Elias testet für Sie (11): Tramsitze
- Familie uf Bsuech
- Elias testet für Sie (10): Ostkaka