Wuche 10

Geschrieben am 15.09.2006 um 18:51
Kategorien: RS |

So die Wuche isch es voll wiitergange mit de Wetterusbildig. Am Mentig simmer drum wider chlige go sondiere und gad mit Unterbesetzig, 4 Rekrute (+1 Fahrer) anstatt 6 Rekrute (+2 Fahrer). Und jede het mol alles mache müese, ussert fahre halt. Das heisst, das mir de ganz Tag dure vier mol alles ufbaue und abgrumt hend. Aber will mer defür nöd so lang brucht und vorallem nochem Ufstelle mues warte bis dSondierig fertig isch, hani no ganz vill Föteli chöne mache. I hoff dasi do demit nöd allzu vill militärischi Gheiminformatione ad Russe und so bekannt gib

(Das isch Telemetrieeinheit TE wos en Radar drin het wo de Ballon mit de Sonde verfolgt)

(Das isch en Windows NT-Rechner mit 233MHz wo cha uswertige vorneh)

(Das isch en feldtaugliche Rechner für INTAFF, mit Pentium 4 und emne Choschtepunkt vo ca 270′000Fr. ;-))

(Standheizig für de Winter und chalti Nächt *SIIIIIEG*)

(Und 230V-Steckdose für Natelladegeräte, Kaffeemaschinen und sonstiges Spielzeug ;-))

Am Zischtig hemmer wider INTAFF gha, super Sach - eifach de ganz Morge umeghocket. Eimol hemmer müese für e Virtelstund öpis tue, will es sind es paar Hauptmänner vo de MILAK (Militärakademie a de ETH), zwei Oberscht und eine im Pischi verbi cho sind. Bi dem mitem Pischi hani denn de Schriftzug “US Army” chöne lese. Aha, öffentlichi Militärspionage Am Nomi hemmer denn mol INTAFF i de Fahrzüg gmacht. Also hemmer üs en Schüsskommandantepuch gno und sind hine ine uf de polschterete Sitz go penne. De ander hets nöd so tragisch gfunde, das mir bim “DAHER!” nöd cho sind und üs es paar Kamerade go wecke cho sind - aber mir hends halt eifach nöd ghört wie er gruefe het Am Obig hetemer no Usgang gha, aber mir hend gfroget öb mir dörfet go Fuessball spile und hend denn das gmacht. Aber will FAK gsi isch, hemmer nochem tschute schono gnueg Ziit gha zum es Glace go esse und eis go trinke.

Am Mittwoch isch denn wider mole Wetterusbildig gsi. Dasmol taktisch ufstelle, das heisst mit tarne und chlige grössere Distanze. Und uf Ziit. Und unterbsetzt. Super Sach, alli gsecklet, aber de Chef isch halt nöd so zfride gsi - egal. “Das ganze noch einmal.” Und denn lueget er uf dUhr und seit: “Ähm nei, mir hend demfall kei Ziit meh, mir gönd go esse.” *SIEG* Am Nomi denn no Softwareusbildig. Und will das so schwirig isch und mer sicher en Nomi brucht defür, hemmer 2 Stunde Pause gha und am Schluss no chlige “Top Gear”-Filmli guckt. Am Obig denn no Repetition vo Funkantenne ufstelle (i has zwor no nie gmacht, aber noch eimol zueluege chan mer das au) und denn no chlige funke. Hoggi inen Schützepanzer ine, nimm mis Funkgrät in Betrieb und warte. Bi eim isch es nöd gange und drum hemmer e Stund gwartet und sind nöd mol meh zu de Verbindigskontrolle cho. Super Alass gsi

Am Donschtig simmer denn mol chlige weg vo Frauefeld uf sonen Hügel ufe. Mir sind dasmol überbsetzt gsi und hend 20 Minute Ziit gha bis zum Sondestart. Serschtemol hemmer vo nix e Ahnig gha und hends nöd gschafft. Ajo, de Chef het gseit, das Kabel müend am schnellschte gleit werde. Und das isch min Job gsi. Denn haltet mir ah, ladet Kabel ab, i renn los und bi vorem Fahrzüüg am Ort gsi. Denn chunt de Chef: “Müggler, wa machet si gopferdammi do?” - “Kabel verlegge.” - “Und was machet si do obe??” - “Jo die Kabel müend do ufe!” - “Ah si sind scho do?” - “Jo!” Und denn heters Gsicht recht verzoge Naja, het denn doch nöd klappet, mir hend 22 Minute gha. Erstelle und das ganze noch einmal. Zerscht aber Pause. I ha vergesse sBeret abzieh. “Müggler!” - “Hier!” (Und ha sBeret abzoge) - “Scho zspot! Kennet Sie de Drü-Punkte-Befehl vo de Verschiebig?” - “Nei?” - “Si rennet zu de TE, rund 150m, machet döte 20 Ligestütz und denn renet si wider zrugg. Und wenn Si i drü Minute nöd wider do sind, denn chönd si nomel goh!” Jo und denn halt chlige gsecklet und gschnufet Und denn gohts witer mit Sondiere. Mir hend anderi Jobs gha, aber i bi jo gern mit zwei Kabelrolle 150m de Hill deruf grennt und has drum am andere abgno. Dasmol isch de Ballon verplatzt und die hend nomel eine mache müese - Ziit isch bi 20:38 halt zvill gsi. Erstelle und zMittag esse. Huere lässig gsi so mit Offizier ums Füür umehocke und brötle, so Jungwachtlageratmosphäre halt Denn hend dOffizier afange flueche das sOffiziersbsteck eigentli nöd für höheri Unteroffizier segi und das die ab jetzt eigentli gopferdammi us de Gamelle esse sötet *lol* Am Nomi das ganze noch einmal. Dasmol en Schogijob gha und bin mit mim Teil recht schnell gsi, aber dKabel hend dasmol zlang brucht und drum hemmer 23:00 brucht. “Herre das chas nöd si!! Entweder si schaffets jetzt oder mir machet das no di ganz Nacht dure!” Okey nomel vollgas geh und denn hemmers mit 19:52 gschafft. Eigentli hetemers i 16 Minute gha, aber üsen Gruppefüehrer het saueklig tue und het unbedingt es Signal vo 90dB wölle und 60 hendem nöd glanget. Naja, üs hends au scho gseit das 40 im Notfall langet. Denn hetemer no müese PD mache, aber es isch Essensziit gsi. Drum nur no go tanke und nofülle - und es Kabel flicke. Und zwor chunt uf de Siite sKabel use, und seb isch zchurz gsi. Zum das flicke mues mer dRolle abrolle, nozieh um zwei drü Meter und wider ufrolle. Und die Rolle isch 600m lang. “Müggler!” - “Hier!” - “Halten Sie das Kabel.” - “Verstande!” - “Und jetzt rennet Sie! Und zwor so schnell wie Si chönd, i ha hunger!” Zonk, denn renni halt 600m mit Gwehr, GTE und dem Kabel. Nochher recht tot gsi, aber immerhin hani nüm müese mitmache bim Staffleufwickle, wo sich no es paar Blotere a de Finger gholt hend Und denn am Obig hemmer no en riise Hit chöne mache: Sport! Und zwor Fuessball und Unihockey. Und nöd ufem Sandplatz, sondern de geili Oberwachtmeischter het e Wiise organisiert und en Teerplatz. Und denn simmer zwei Stund nonstop am seckle gsi. Hammer!

Am Fritig morge abtrette und weg Ah jo, die Wuche no Zimmerchef gsi, das heisst immer 10 Minute früener ufstoh und immer bis ABV wach si und für Zimmerordnig luege.

Kommentare

If you would like to make a comment, please fill out the form below.

3 Comments so far

Soldat Kenel September 16, 2006 13:02

Tach miteinander,

tjo dä wucheafang isch bi mir prägt gsi vo Führungsausbildung (FUM) und sustige luschtige Schlofstunde.:-)
Mir hend aber au no chlige Funkgrät-Usbildig gha. Zersch mol die chline 2. S’altbekannte SE-138, so das 0815-Funkgrät i de Schwiizer Armee und denn no s’SE-135, es ganz spassigs Grät, wo mer jedi Mengi Seich demit mache chan. Das grätli bruucht so jedi Mengi Date und die sind uf sonere FillGun gspeicheret und dötte stoht druf “GEHEIM”, also nöd hei neh.
Isch schön, dass es en Notlöschchnopf het, wenn dötte drufdrucksch sind alli Date weg. “Wenn sie das mached, laufed si uf Rümlang und erkläred em zueständige Brigadier, wieso die geheime Date fehled” hmmm nei.

Am Dsischtig hemmer denn mit üsne Velo mol 2km verschobe und hend denn Gfechtsusbildig gha.
1. Poschte: Gefechtszeichen. Isch ganz e bruuchbari sach, au für anderi sache, wil “Achtung, Panzer” chammer doch verschiede interpretiere.

2. Poschte: Gesicherter Halt. Wie müemer üs bimene Halt verhalte und wie absichere, das mir nöd überrascht werde chönd.

3. Poschte: Vorrückend im gefecht. Das isch das wo würkli spass macht. immer 2 2er gruppe rucked parallel vor, wobi immer die eint gruppe die ander deckt, das ganze im wald und nume mit Zeiche.

Am Mittwuch isch widermol was los gsi. Zersch am morge Zugschuel und zwar so wie mirs a dä Inspektion müend mache, nume dötte müend es paar vo üs das ganze Kommandiere und nöd üse Klasselehrer (öppe s’gliche wie e Zgfhr). Denn hemmer widermol achsointeressantes FUM gha und denn Kriegsvölkerrecht. “Es isch vo obe vorgeh, dass mir si i dem usbilde mönd, aber mir bruuched für de verdammti Seich nöd meh als e halb stund.” Tjo, isch aber sowieso e komischi sach, i mein chinder ab 15 chömed is Chriegsgfangene-Lager, die jüngere, wo genau mit dä gliche Waffe umelaufed nöd. Als ob en Chopfschuss vomene 10 Jährige weniger tödlich isch, als dä vomene 30 jährige Soldat.

Am nomitag wider Zugschuel, FUM und den am Obig FAK-Usgang.

Dunschtig:
Am morge chlige Sport, denn HG-Usbildig *gähn*
Am 1300 simmer uf en 12km-Marsch… 12km isch jo nüt, aber ebe Luftlinie, bzw. ohni Berücksichtigung vo dä Stiigige. 150 Höhemeter ufe, denn wider abe, wider 200m ufe, denn wider hundert abe und so wiiter. Denn hemmer no eine i dä Marschgruppe, wo sich es Band agrisse het und das isch jetzt entzündet, aber meinsch er wür sich endlich mol e Dispens hole oder zum Arzt? Nei, er lauft mit, aber ebe so langsam, das üs andere fasch s’Gsicht ischloft. Super.

Am Endi vo däm Marsch hemmer no müese es Biwak ufbaue und betriebe. Als erschts hemmer mol e Füürstell gmacht, natürli streng noch reglement, längeverhältnis 4:2, usrichtig noch Weste, 50cm tief. *g*
Denn schnell 8 Zeltblache zämegmacht und scho hemmer üses Zelt gha, natürli no en Wassergrabe usw. alles kontrolliert vomene Of-Awärter, so eine wie ich, eifach scho chlige wiiter.
Und wil das so isch mues es imene Biwak immer mindestens e füürwach ha und die het bi üs us 4 Mann bestande. Also schnell für die ganz Klass en ablösigsplan erstellt, alli Gruppechefs (ich bi eine devo gsi) vom morge am 3 bis am 4i, das die ander wenigstens öppis warms am morge überchömed.
Denn chunnt en neue Befehl, Tagwach am morge am 3, tja ich mach kein neue Wachplan, die letschte, also mir Gruppechefs müend nüm uf d’wach *hehe* *schnarch*
Denn hemmer so chlige koched und hends gmüetli gnoh, chunnt dä Schuelkommandant verbi. D’romands-gruppe gseht en, meldet aber nöd, usserdem hends es riiise Puff gha, aber si hend jo au ihri mitbrochte Servelats müesse uspacke. Do hets en schomol agschisse und er hets zämegstuucht.

Denn isch er zu da dütschschwiizer cho , 4 mit em nintendo DS am Mariokart zocke, die andere hängets am Füür und choched, en radio lauft. Zersch hetter mol wäg em radio und dä Nintendo dumm toh, vo wäge audiovisuelle Geräte seged gemäss Dienstbefehl i dä Arbetsziit nöd erlaubt und das gebi Disziplinarstrofe *bububu* *jööö*
Aber wo er denn gseh het, das eine es Bajonet inene Baum gsteckt hend, zum dä Radio ufhenke, isch er voll duregheit.
Het fasch agfange brüele, wo er üs gfroget het, ob mir denn das gern hend, wenn üs öpper es Messer is Bei steckt, zum en Radio ufhenke, und das seg doch au es lebewese und dä Holzertrag werdi au schlechter. Erkenntnis: üsen Schuelkommandant isch en veganische FDP’ler.

Bi minere Gruppe het er denn bemänglet, das d’Gamelle uf em bode gstande sind. “Wer isch do Gruppechef?” “Oberstlütnat Anw Kenel” “Finded si da guet?” “Isch mir eigentli egal, wil es isch sini Gamelle und er muess drus esse” “WAS?” “Sini Gamelle, sis Problem” “Sind sie eigentli verruckt…” “Nöd das i wüsst” “… sie als Gruppechef sind au für d’gsundheit vo ihrene Unterstellte verantwortlich” “Scho? *ganz unschuldig schau* ” “jo sicher!” do herts em glanget und er isch zu dä nächste und letschte Grupe abdampft.
Bi dere Gruppe het eine is KA müesse und wil er gfunde het er müesse si gwehr nöd mitneh, het ers lige loh. Sini gruppe het em denn als Denkzettel es paar Schoggistich verpasst (Schoggistich = Gewehr mit dem Lauf in denn Boden stecken, Lauf voller dreck, putzen und zwar lange ), dummerwiis isch das gwehr denn nochher mit em Lauf noch une anene Baum gstellt gsi, dä Kdt hets gseh und denn hets en vol verjagt. Ert die ganz Klass is daher gholt und alles nomol widerholt. S’puff bi dä Romands, S’bajonett, dä radio, d’gamelle am bode und s’gwehr. Nochdem er sich nochli ufgregt het und üs gseit het, dass dasschlimmschte gsi seg, wo er jet gseh heg isch er zu dä nächschte klass. Mich und es paar anderi hets fasch vertätscht vor lache, es paar “weicheri” sind voll am bode gsi und hend angscht gha vor enere strof
So hend mir üden kommandant kenneglernt und wüssed jetzt,
er isch en ordnigsliebende, subberkeitsfanatische und veganische FDP’ler.
Nume zur Info, mir sind imene BIWAK gsi, also im wald mit allne mögliche Viecher vom Ohrwurm bis zur Zecke.

E stund spöter isch denn üsen klasselehrer cho ujnd es sind natürli die wildeschte Grücht umegange, weli strof das üs erwartet. Er het denn alli Gruppechefs is Daher gholt. “So mini herre, was denked si zu dem Vorfall?” Mir hend denn chlige Disutiert. “Nume das si das wüssed, für mich isch die sach gegessen, do hend si ihre Radio wider” Also weder strof no sus öppis. geil

Den simer go ligge, i han nochlige ini rueh welle und bin eifach imene Bau an Bode glege und han so vor mich anestudiert. Noch emen Wiili han i mir no en Wassersack als Chopfchüssi gholt. Woni denn is Zel han welle, isch eine so halbe uf mim Platz glege, do han i e zeltblache gholt und bin wider zu mim wassersack. Han denn döt use pennt, voll friedlich, und i han guet pennt, obwohl i vollmontur, sogar mit em Gwehr.

Fritig:
Am morge am 0230 bin i ufgstande, han denn am 3 die andere gweckt und denn hemmer üses Biwak abbaut, wil am 4i hemmer müesse abmarschbereit si. Mir hend alles wider müese so mache wie vorher, also au alli Gräbe zueschütte und natürli kei abfall. Am 4i simmer hemmer denn de schlofsack ufs velo verade und mit em Kampfrucksack am Rugge ufgstige und sind üs go abmelde. Denn simmer im dunkle bi rege heizuegrast, natürli noch charte. Dä hit isch gsi, wo mir mit öppe 45km/h im Wald so en Weg aberased und mis Dynamo gheit use… geil

Am 6i simmer i dä kaserne gsi und wil üs da Kadi gseit het mir sölled PD mache, hemmer halt das au gmacht, also alles schnell butzt, sogar s’schueh.
am 8i hemmer müesse im 300m schüssstand si und hend denn dötte dä ganz morge üsen spass gha.
Am nomi HG-Usvildig und am obig WEB (wiedererstellung der Bereitschaft) also grosse PD. Wiol mini Gruppe en grossteil scho am morge gmacht het, han i no schnell s’gwehr butzt und dä rescht schnell abgribe.
Am 1900 han i chöne dä fiscfh mache, wil gueti Leischtig im OL.

Ahjo und min brüeder, da Lukas, isch 2. worde am Zürcher Knabenschiessen.
http://www.knabenschiessen.ch
-> Man beachte die frisur.

Schöns Weekend
Stöffel
Soldat Graber September 17, 2006 03:03

Und die letscht Wuche woni vollschtändig in Wange absolviert han isch vorbii…
No 4 Täg, nochher uf Schwede und nochher scho iirucke in Bremgarte (AaRgAu) für di zweite füf Wuche Awärterschuel und nochher no vier Wuche UOS…
Die Wuche hemmer d Dreharbeite abgschlosse: üsen Zug hett en halbe tag lang als schtatischtene für e Uusgangsszene dient. Das heisst mir sind vom mittag bis mitternacht im schpunte ghocket und das das ganze au echt wirkt hemmer chöne di ganz ziit alli getränk gratis konsumiere *geil* =) Und i ha sogar eis Wort dörfe sägä im Film: Wenn de schauschpieler noch de szene ufschtoht vode bar frogter mich näbäzue öbi chöm go töggele und denn schrei ich “Jop!” - Man schtelle sich vor: sämtlichi folgendi Rekruteschuelene xehnd de Graber wo “Jop” seit im Film während enere PPD-Lektion *stolzseinoderauchnichtlol*
Aber selbschtverschtändlich hemmer au echli schlaueri Sache gmacht die Wuche. Sport hemmer viel gha. erschtens mol für militärschportabeiche… jäjoo hets halt net glanget… *chan passiere* Denn hend mir awärter wiiter no d’Hindernisbahn gmacht und sonen 12min-Kondition-und-koordinationsparcours-parcours… und bi dem chunnsch no recht is schwize…
Im Kompanieschport hemmer sonen Schternlauf gmacht. Würfle, e rundi seckle und denn zum entschprechende poschte god ufgob mache. Für es EF hemmer am schluss mind. siebe versch. pöschtene müese gmacht ha… aber wellmer für das 90min Ziit gha hend hett eigentlich niemert motivation zum seckle chöne ufbringe
Fachdienscht hemmer hauptsächlich im Üebigsdorf gmacht: Abseile, Patiente abinde zum nochher useme Schacht use hole und so sache (vgl. Bild) und als zweits hemmer BBK gmacht: Brandbekämpfung. Zerscht d Brandagwöhnig: hemmer i some hüüsli mol chli igführet und sind nochher döt ine ghocket und hend glueget wie das so isch… so ums füür ume chunnt das so gegä 1000°C und das isch de schono warm. Denn simmer näbeds füürli gsässe und d’kollege dusse hend wasser ufs füür gschprützt “es chunnt jetzt denn d’Dampfwolke und die isch no viel heisser. Also sötted sie bis die dure isch d Luft ahalte süscht verbrennts ine d Lunge!” Jä so - sehr schön
Wiiters hemmer verschiedeni sache azündet und verschiedeni füürlöscher usprobiert (Wasser, schum, cholesüüre und no meh) und glueget was für was geignet isch. Agfange bime simulierte Chuchibrand (> Bild) bis zum Metallbrand hemmer mol chli sache azündet
S Obligatorische hemmer gschosse die Wuche und denn hemmer mol no BG-4- Schüsse ide KD-Box gmacht und ame Obig mol no es nachtschüsse…
Am Fritig-Nomitag sind alli Awärter mitem Duro uf Bremgarte graaaast zum üses künftige neue dihei go rekognosziere… (mitem Duro verschiebe isch immer wieder witzig - de nochfolgende autos hemmer amix di schöne fraue i üsne heftli zeiged und glueget wies reagiered LOL)
Bremgarte isch no es rechts grosses Gländ. aber kein Zaun rundum. Dat heisst sie hend döt oft nervendi zivilischte wo umelaufed… Diversi Baute vo dem Waffeplatz sind gschperrt zum baue: Einschturzgefärdet **lol**
Denn heissts: “jetzt gömmer no im lockere Laufschritt gos Areal besichtige!” Also jo - das mitem lockere laufschrit… “mini herre, gwöhned sie sich a das - das isch schtandart do!” Verschtande, i freu mi druuf…

So, und das ihr au mol chlige xehnd was bi eus so goht, hani do es paar bildi ufgschalte:
Rttg RS 75-2 Kp 2 zug Rohr!

Hey hou… en schöne zäme
Christian
sportkleding März 12, 2010 08:57

nice

Wuche 10

Kommentare

Leave a Comment

Aktuell

Kategorien

Archiv

Monthly Archives

Find It

Admin

Design